التحول لنظام الماك بعد 15 سنة من ويندوز

يا هلا بالجميع! سالفتي طويلة شوي فتحملوني 😅 طبعاً أنا طالب جامعي طالب هندسة برمجيات وطول عمري اشتغل على ويندوز, من كان عمري 4 سنوات بديت استخدم ويندوز xp في جهاز الوالد الله يحفظه وكان بوابتي لعالم التقنية, واستخدمت ويندوز 7 --> 8 --> 8.1 --> 10 --> 11 وطبعاً أسوأها كان ويندوز 8 😏. أنا لست مستخدم عادي بل احب الغوص بالنظام والتعديل والتبديل والتنصيب والتركيب والغوص في أعماق النظام متعه كبيرة بالنسبة لي! بطبيعتي أنا شخص مُحِب وعاشق للتقنية بشكل عام. على أية حال أخر جهاز ويندوز استخدمته هذا الجهاز ‪:‬

https://www.notebookcheck.net/Lenovo-Yoga-920-13IKB-80Y7.263178.0.html

1 تيرا -i7-8550U - شاشة اوليد 4K لمس - SSD M.2

الجهاز كويس ما شاء الله وله معي 4 سنوات ونص تقريباً...ولكن بالسنة الأخيرة صار يعلق أحياناً بشكل مزعج وترتفع الحرارة بشكل مبالغ فيه وقررت اشتري لابتوب جديد فكرت بالماك بوك بما أن كل اجهزتي المحمولة من ابل (أيفون وايباد) ولكن كنت خايف من نقطة أني راح آخذ وقت كبير عشان اتعود فقررت اشتري لابتوب ويندوز وأنا مستحيل استغني عن الويندوز مهما كان!!

إلى أن حصلت مشكلة! الجهاز أحياناً يطفي بدون سابق إنذار! تجاوزت المشكلة بما أني غالب الوقت اشبك الجهاز بشاشة خارجية, إلى أن حصلت المشكلة الأكبر! علق الجهاز فقررت أعيد التشغيل ثم طلعت الشاشة الزرقاء (شاشة الإصلاح) فحطيت الإكمال إلى ويندوز 10, الجهاز بعدها صار بطيء جداً وثقيل بشكل لا يوصف!! قررت اسوي فورمات والفورمات قعد اكثر من 8 ساعات رقم ان الجهاز قوي جداً وفيه SSD!! والجهاز اصبح لا يعمل إلا بتوصيل الشاحن! فكيت الجهاز فوجدت أن المراوح لاتعمل!! والجهاز لازم اصلحه, ولا يصلحه إلا شركة ensure بالرياض والله أعلم كم بيكلفني ولكن لازم اصلحه لأني ما استغتني عن الويندوز

وهذي من مشاكل أجهزة ويندوز العويصة مع الأسف, أنا شخص صاحب استخدام ثقيل الجهاز, بعد سنتين وحد أقصى 3 سنوات تظهر عدة مشاكل باللابتوبات و تبدأ تنقص قوتها وأداءها بشكل كبير ومزعج مهما سويت فورمات مليون مرة! على النقيض مع كثير من أصحاب الماك الي أغلبهم مدحوا أن الجهاز يصمد معك مدة طويلة, كثير جلست معهم أجهزتهم أكثر من 5 سنوات وهي تعطيك الأداء الممتاز وبدون مبالغة شخص يقول أن جلس معي 10 سنوات! ما اقول انه بنفس أداءه طبعاً ولكن ما زال يقدم أداء ممتاز. هذي مشكلة كبيرة! اللابتوب جهاز العمل الأساسي, فلازم يعيش معك اطول فترة ممكنة, هو مو جوال لازم تغيره كل 3 أو 4 سنوات!

وبعد ما حصلت المشكلة الأخيرة قررت أن الجهاز الجديد لازم يجي بأسرع وقت وتوكلت على الله وأخترت الماك بوك برو وهنا ذكرت كيف ذكرت كيف حصلت على ماك بوك برو بسعر أرخص :

شريت ماك بوك برو بسعر مخفض وجميل

بداية التجربة الجديدة! وصل الجهاز ولله الحمد ووقتها قلت في نفسي الله يعين راح أخذ وقت عشان أتعود وراح أتضايق بسبب إختلاف النظام ولكن سبحان الله, أنا انصدمت من نفسي حرفياً كنظام جديد علي بالكامل, التجربة كانت أسهل من المُتوقع بكثير! توقعت أني راح أخذ اسابيع و شهور عشان اتعود ولكن في وقت كتابتي لهذا الموضوع الجهاز له معي أسبوعين تقريباً. نعم توجد الكثير من الإختلافات ولكن التشابهات طبعاً موجودة! من الأشياء الي ساعدتني على التأقلم السريع كوني شخص محب للتقنية والاستكشاف والتحرك بالنظام هذا ساعدني كثير, مو كل الناس يحبون الاستكشاف والبحث, كثير من الناس مستخدمين عاديين وهذا ممكن راح يصعب التجربة ولكن ما يخليها مستحيلة التعود.

إختصارات الكيبورد ايضاً راح تساعد كثير لأن نظام الماك حرفياً هو نظام إختصارات بشكل كبير! ومن الاشياء الي راح تساعدك على التأقلم هو امتلاكك لأيفون أو أيباد وإذا كنت مثلي متمكن ومحترف بإستخدام نظام iOS فهنا راح يكون الوضع عندك أسهل بكثير! التكامل مع أجهزة الأيفون والأيباد شيء عجيب وخرافي يا جماعة! كنت أتوقع أن بعض مستخدمين الماك يبالغون ولكن فعلياً بعد ما جربتها عرفت انهم ما يبالغون. غير أن بعض تطبيقات الأيفون أو الأيباد تشتغل على الماك وهذا شيء ما كنت أعرفه وأعجبني بشكل كبير 😍!! هذا غير أن أغلب البرامج الموجودة بـ ويندوز متواجدة بالماك وتشتغل بشكل ممتاز وتطبيقات المتجر ممتازة جداً والمتواجد منها بـ ويندوز تجده بالماك أحسن بكثير! مثل تطبيق الواتساب وتيليقرام أفضل بكثير من ويندوز!

بالطبع الماك توجد فيه سلبيات بطبيعة الحال منها مثلاً عدم تواجد حافظة النسخ والي كان شيء اساسي لي بـ ويندوز ولكن الحمدلله لقيت برنامج بسيط يحل المشكلة. وللي ناوي يحول للماك أو ما يعرف يستخدمه بشكل كافي أنصحكم بقناة يوسف الشمراني على اليوتيوب خصوصاً الفيديوهات الي يتكلم فيها عن المستخدمين الجدد والإعدادات الي لازم تسويها.

كلمة مهمة و أخيرة : ليس الكل راح يمر بتجربتي والوضع راح يكون سهل بالنسبة له...من البداية أنصح إذا ما كان عندك انجذاب لفكرة التغيير أو الرغبة للتحويل فأنصحك ألا تقوم بالتحويل, التغيير يحتاج (صبر) كبير يا جماعة عشان تتعود ويصير الوضع ممتاز غير كذا ما راح تحب الوضع أو تتعود طبعاً. شفت أحد المواضيع هنا في البوابة الرقمية لشخص حول بعد سنوات عديدة ويقول انه بعد 3 اسابيع انه سيء ومعقد ومن كلامه تحس انه مشخصن تجاه النظام ولا تدري ليه حول له اصلاً 😅! للأسف فيه كثير من الظنون الخاطئة عن نظام الماك منها (أن ما يمديك تنزل برامج من خارج المتجر) 😅!! وهذا غير صحيح. وتوقعي أن كثير من الناس جربوا النظام قبل سنوات ولكن, من مطالعة وبحث أكتشفت أن في كثير اشياء تغيرت بأجهزة الماك وبنظام الماك بالسنوات الأخيرة خصوصاً بتحديث Sonoma الأخير, عدة أشياء تغيرت وانا اظن لو أني استخدمت الماك وقت تحديثاته القديمة ما راح يعجبني الوضع واتعود بسهولة زي ماهو معجبني الآن.

وبس أذا وصلت لهذا السطر شكراً لك قراءة الجريدة الي كتبتها 🌚❤️